Tuisblad

Die Affie 100 Fonds Trust ondersteun die #sporetotstrome projek wat aan jong Affies die kans bied om in jou voetspore te volg met uitsonderlike onderrig in ‘n ondersteunende, Afrikaanse gemeenskap.

17 Oud-leerlinge en -vriende van AHS en AHMP pak die tog aan om Kilimanjaro te klim en die piek te bereik op 28 Januarie 2020 tydens die skole se 100-jaar vieringe.

Ondersteun hierdie projek deur R19.20 per 100m te skenk vir #sporetotstrome.

Hou hierdie blad dop vir meer inligting en hoe om te skenk. Deel asseblief met al jou vriende en familie.

JY SAL EENDAG

Jy sal eendag kan terugkyk
na die seer, en na die mooi;
na hoe vinnig jy kon hardloop
en hoe ver jy spies kon gooi.
Want hier het jy geleer
dat om te slaag, jy dikwels faal –
maar dat opstaan en immer weer probeer
die oorwinning sal bepaal.
Hier klop steeds ‘n duisend harte
wat oor tyd en afstand fluister –
dis ‘n stem wat met jou siel praat
as jy stil word om te luister.
Jy sal eendag weer my voetval
in jou herinnering hoor klink
toe ‘n onbekende toekoms nog
onweerstaanbaar kon bly wink.

Jy sal eendag steeds my stem hoor
as jy wonder oor die lewe;
oor die bate van die deug,
oor die waarde van ‘n strewe
na dít wat jou beskore is,
maar tóé nog onbereikbaar ver –
hier leer ken jy wel jou ware Noord
onder die Suiderkruis se ster.
Jy sal eendag wel besef
dat jy steeds in Afrikaans kan droom,
want dit is my geskenk aan jou,
sonder huiwering of skroom.
Jy sal eendag steeds onthou
hoe ‘n klok die tyd se gang
met net ‘n enkel noot voltooi:
Dán sal jy weet wat is verlang …

Coenie de Villiers
2017